បាត់ដំបង៖ រដ្ឋមន្ត្រីមហាផ្ទៃលោក ស សុខា បានលើកឡើងថាពេលនេះអាជ្ញាធរកំពុងធ្វើការស៊ើបអង្កេតពីខាងលើមកវិញចំពោះអ្នកនាំចូលគ្រឿងញៀនចូលកម្ពុជា បន្ទាប់ពីទទួលបានតំរុយថាមានអ្នកមានអំណាចនៅពីក្រោយការនាំចូលនេះ។
ថ្លែងក្នុងពិធីសំណេះសំណាល និងបិទវគ្គបណ្ដុះបណ្ដាលជំនាញវិជ្ជាជីវៈ ផ្នែកទ្រឹស្ដី និងអនុវត្តដល់អ្នកញៀនគ្រឿងញៀន នៅមជ្ឈមណ្ឌលបន្សាប ព្យាបាល និងស្ដារនីសម្បទាអ្នកញៀនគ្រឿងញៀន កែ ស៊ីនួន ស្ថិតនៅស្រុករតនមណ្ឌល ខេត្តបាត់ដំបង នាព្រឹកថ្ងៃទី៤ ខែកក្កដា ឆ្នាំ២០២៤ លោក ស សុខា បានលើកឡើងថាតាមរយៈការស្រាវជ្រាវរកករណីនាំចូលគ្រឿងញៀន ២០គីឡូក្រាមចូលកម្ពុជាដោយជនជាតិនីហ្សេរីយ៉ាម្នាក់ ក្រសួងមហាផ្ទៃបានរកឃើញថាជននេះមានមានទំនាក់ទំនងជាមួយអ្នកនៅភ្នំពេញ ដោយមានការទទួលការកម្មង់ទិញតាមបណ្ដាក្លិបកម្សាន្តសប្បាយៗមួយចំនួន ហើយក៏មានថ្នាក់ដឹកនាំមួយចំនួននៅពីក្រោយផងដែរ។
លោកថា៖ «អ៊ីចឹងហើយឥឡូវយើងកំពុងធ្វើការងារនេះបញ្ច្រាសទិសវិញ។ អ្នកណាអ្នកលូកលាន់ត្រូវតែរកឱ្យឃើញហើយជាពិសេសដាក់ទោសទណ្ឌតាមច្បាប់»។
ជាមួយគ្នានេះលោកក៏បញ្ជាឱ្យសមត្ថកិច្ចចុះបង្ក្រាបទីតាំងអាជីវកម្មកម្សាន្តដែលមានប្រើប្រាស់គ្រឿងញៀនឱ្យបានខ្លាំងក្លា៕
